सदानि नि रैंण रे झ्यूंतु तेरि जमादारि

हैंसल्ये स्य हैंसि तेरि, सदानि नि रैंण 
आंख्यूं मां हमरि भी
आंख्यूं मां हमरि भी, सदानि नि रैंण असाधरी
सदानि नि रैंण रे झ्यूंतु तेरि जमादारि, सदानि नि रैंण रे झ्यूंतु तेरि जमादारि 
रे झ्यूंतु तेरि जमादारि….
एकहत्या राज तेरो – एकहत्या राज तेरो, सदानि नि रैंण, मुण्डमां ताज दिदा सदानि नि रैंण
सदानि नि रैंण दिदा सदानि नि रैंण
पालै सि सेक्की तेरी घाम आणै तक, पालै सि सेक्की तेरी घाम आणै तक
अर घाम ऐगे अब धराधरि- अब धराधरि
सदानि नि रैंण रे झ्यूंतु तेरि जमादारि, सदानि नि रैंण रे झ्यूंतु तेरि जमादारि
रे झ्यूंतु तेरि जमादारि….
जुलम का अंधेरा- जुलम का अंधेरा, कब तक राला, हम कुल्लि कबाड़्युंका दिन भी आला
दिन भी आला भयुं दिन भी आला
हमभि बटोरला कभि द्वी हातुन, हमभि बटोरला कभि द्वी हातुन
हमरि भी पोड़लि येनि घतासरि- येनि घतासरि
सदानि नि रैंण रे झ्यूंतु तेरि जमादारि, सदानि नि रैंण रे झ्यूंतु तेरि जमादारि
रे झ्यूंतु तेरि जमादारि….
अंगोठु घिसे ठप्पा- अंगोठु घिसे ठप्पा, मारीमारी, पूरी नि मिलि कभि मजुरी ध्याड़ी
मजुरी ध्याड़ी भयुं मजुरी ध्याड़ी
ढुंगा बणिग्यां हम माटअम मिलिग्याँ, ढुंगा बणिग्यां हम माटअम मिलिग्याँ
जुग- जुग बटि ढुंगु माटु सरसरी- माटु सरसरी
सदानि नि रैंण रे झ्यूंतु तेरि जमादारि ,सदानि नि रैंण रे झ्यूंतु तेरि जमादारि
रे झ्यूंतु तेरि जमादारि…