यूं दानी आन्ख्यों मा छम छम पाणी अज किले होलू आणु कुजाणी

यूं दानी आन्ख्यों मा छम छम पाणी
अज किले होलू आणु कुजाणी
यूं बुड्या आन्ख्यों मा लण मण पाणी
आज किले होलू आणु कुजाणी
यूं दानी आन्ख्यों मा छम छम पाणी
 
घर बण गों खोला अपड़ा पराया
जों छोड़ी परदेश अयुं मि
जों डांडी कन्थ्यों मा बालापन बीती
सुख सुविधों मा बिसरी गयुं मि
सुख सुविधों मा बिसरी गयुं मि
करज च मेपर विं धरती कू
करज च मेपर विं धरती कू
व्हे होली सैद कर्ज उगाणी
यूं दानी आन्ख्यों मा छम छम पाणी

सभी सुख छन पर तिसलु पराण
आज किले टपट्याट कनु च
जे खेरी छोड़ी परदेश भागु
व्हीं खेरी खाणोंज्यू फिर बुनु  च
व्हीं खेरी खाणोंज्यू फिर बुनु  च
जनम भूमि कि वा नांग व् भूख
जनम भूमि कि वा नांग व् भूख
कथगा सवदी छे अब याद आणि
यूं बुड्या आन्ख्यों मा लण मण पाणी
 
ईख गमलों मा सजयूं छों मि
कब तक रोलु हेरू व्हेकि
अपड़ा जलडा काटी अयुं छों
सुखणु छों अब जरा जरा केकी
सुखणु छों अब जरा जरा केकी
ज्वनी काट्याली झूठा सुख मा
ज्वनी काट्याली झूठा सुख मा
बुढापू इथगा रुवालु नि जाणी
यूं दानी आन्ख्यों मा छम छम पाणी
 
पोंखुर हूँदा उडी जांदू मुलुक
बिसरयूं बाटू खुजांद खुजांद
इंडली मा बैठी दयाखणु रैंदु
डाँडो सिलु घाम अछ्यांद
डाँडो सिलु घाम अछ्यांद
उखी विं डंडयाली मा छुट्दा पराण
उखी विं डंडयाली मा छुट्दा पराण
मन मा रेगे या आखिरी स्याणी   
यूं दानी आन्ख्यों मा छम छम पाणी
अज किले होलू आणु कुजाणी
यूं बुड्या आन्ख्यों मा लण मण पाणी
अज किले होलू आणु कुजाणी
यूं दानी आन्ख्यों मा छम छम पाणी
 
 
SONG LINK:
https://www.youtube.com/watch?v=kHy3-VU87Pw
 

 
KARAOKE LINK:
https://youtu.be/v2Sxq6ICQ50